Sportsoho 2024年五月號內容包括:
跑過亂流｜大埔之子 － Poki 吳保錡｜2024年5月號
風吹雨打，根基不動。
由細到大都唔服輸，性格唔多唔少造就到今時今日嘅保錡。
自問係「屋邨仔」出身，保錡指屋企人唔會支持自己追夢（起初希望成為足球員，到後來成為藝人），
亦被多番勸喻要搵份穩定嘅工作，保錡反而更加希望做到一啲大事證明自己，唔想被人睇死。
為咗成為更好嘅人，保錡開始認真跑步：
「以往有藝人參與十公里賽，跑一個鐘以外，令唔認識跑步嘅普遍市民誤以為跑步係困難嘅事。
但對我嚟講，十公里跑出五十五分之外，都係冇認真練習過。
我希望了解跑步呢回事、認真地跑，畀大眾睇到我以前作為一個肥仔都做到，佢哋都會做到。」
#CoverStory #大埔 Poki 吳保錡 x #民間體育會
保錡早前喺ViuTV節目《公司冇逼我跑馬拉松》最後一集，無懼風雨負傷完成人生初馬，片段喺網上瘋傳，堅毅嘅精神得到大批網民讚賞。保錡可以話係跑出Fever，話俾人聽佢唔再係娛樂圈嘅Error，一洗以往嘅負面形象，實現「跑跑可以重生」！由搞笑藝人變成運動藝人，當初保錡點樣同跑步扯上關係？點解會成立 #大埔民間體育會 ？大埔同佢嘅運動生涯又有咩關係？當初自稱「大埔之子」又係咩因由？#大埔足球會 原來同保錡又有關係？完成馬拉松之後，「內心嚮往馳騁」嘅保錡，下一個「Try Try挑戰姿態」嘗試嘅，又會係咩運動項目？
#SpecialFeature #南區 南區麗池足球會 Beauty Pool Football Union
二十六年前，南區鴨脷洲利東邨嘅街場，一班「利東人」成立名為「麗池」嘅足球隊。二十六年後，哩支球隊已經發展成全港知名嘅五人足球隊，球員亦擴展到來自香港各區以至澳門，而且仲準備踩入中國內地紹興挑戰更高水平嘅聯賽！但無論點變，「南區麗池」二十六年過後始終心繫社區，培訓南區小球員，代表南區參加全港運動會，每個星期亦依然會喺南區舉行練習。當年球會創辦人兼現時主席劉劍風，會親解球隊多年嚟嘅轉變，點樣喺資源有限之下，發展成現時接近全職訓練量嘅業餘五人足球隊。三位球員兼教練蘇來強、陳思駿以及梁家明，亦會分享球隊積極投入背後，有咩理念同願景。
#Junior道場 #將軍澳 #田家炳小學 x 鄧英喜中學冰球隊
有嚟自澳門嘅球員「慕名而嚟」加入南區麗池足球會，同樣嘅事竟然發生喺小學。有學生為咗加入冰球隊，專程由元朗遠道嚟到將軍澳讀書，究竟田小有咩特別之處？創校超過二十年嘅博愛醫院八十週年鄧英喜中學，點解會喺上年突然成立冰球隊延續學生嘅冰球夢？「將軍澳冰球文化圈」點樣產生，令哩個社區開始成為香港冰球新秀嘅搖籃？
#ProSpecial #屯門 #職業籃球員梁兆華
效力香港金牛籃球隊嘅職業球員 #梁兆華，今次返到嚟佢籃球起點－屯門新和里街場，回顧街場文化，點樣成就出自己現時嘅球員風格、籃球生涯甚至佢嘅人生。因為打法硬朗而被戲稱為「屯門牛」，當遇上職業隊「金牛」之後，籃球層面上又得到咩啟發？對佢人生層面上又有咩轉變？
Sportsoho 第136期（2020年5月份）
Sportsoho 第135期（2020年4月份）
Sportsoho 第134期（2020年3月份）
Sportsoho 第133期（2020年2月份）
Sportsoho 第132期（2020年1月份）
Sportsoho 第131期（2019年12月份）
Sportsoho 第130期（2019年11月份）
Sportsoho 第129期（2019年10月份）
Sportsoho 第128期（2019年9月份）
Sportsoho 第127期（2019年8月份）
Sportsoho 第126期（2019年7月份）
Sportsoho 第125期（2019年6月份）
