小弟近日人氣急升，就連編輯老馮大人都成日追問我下次會去邊。繼上兩期出動牛爸牛媽後，今次會請邊位出街呢？呵，學星爺話齋：「俾你估到，我仲係食神？！」小弟今次就單拖帶大家去一個島，一個異常人格分裂嘅島。喺嗰度，你可以睇到香港最發達、最「紐倫港」嘅一面，亦同時會見番香港最原始、最具漁村風味的一面，畀你一次過睇晒香港開埠發展史。究竟係邊度？咪就係馬灣囉。

老鼠樂園嘅鄰居

馬灣其實係一個位於大嶼山及青衣之間嘅島嶼，原名叫「媽灣」，而「媽」就指「媽祖」，即係天后娘娘。呢個島前身係條漁村，後來因為興建青馬大橋，所以出咗名，仲俾某大地產集團睇中，起咗個大型屋苑。心水清嘅朋友應該知道，政府曾經想將大嶼山至馬灣、青衣一帶發展成「旅遊地帶」。起初計劃係喺馬灣起兩個主題公園：一個係東南亞首個室內滑雪場館「香港雪樂園」，原定03年完工，比隔離個老鼠樂園早2年出世。結果？咪無咗下文囉......