「牛英，炎炎夏日去海灘啦！」

「海灘我唔想同人迫喎」

「去長沙好無？」

「長沙？返大陸咁遠」

「長沙！曾被選為世界十大海灘之一、全長三公里、水清沙幼、鬼佬多過本地薑嘅香港渡假天堂──香港長沙泳灘！」

牛英我立即彈起，以快過百米飛人保特嘅速度收拾細軟，準備去呢個香港人間天堂。

誰知，一到東涌──狂風暴雨、3號風球 

環顧四周，就會發現長沙嘅泳客就係唔多。唔知係咪因為個灘好大，所以大家都可以「保持距離」，唔使喺海灘都好似迫港鐵咁！細心望吓，就會發現呢度嘅鬼佬絕對比香港人多！啲外國人成堆成堆咁坐喺露天茶座吹水飲啤酒、有啲就攤喺度曬太陽、有啲就喺淺水地方輕輕鬆鬆咁浸吓水，梳肝到呢！

講開露天茶座，我相信都係長沙泳灘嘅特色之一，大概因為呢度好多鬼佬泳客，所以呢度啲食肆都係裝修得好有特式嘅露天茶座，有西餐、泰國菜，甚至南非菜、地中海菜，不過價錢就預咗唔會平民價啦！仲有呀，聽講有啲餐廳啲侍應只講雞腸，唔識廣東話，所以大家要有心理準備，不過咪當練習吓英文囉。坐喺成班鬼佬中間，食吓Fish and Chips、飲番杯啤酒，望住呢個海天相連的海灘，唔知會唔會令你以為自己置身黃金海岸（我指澳洲個Gold Coast，唔係屯門嗰個！）又或者係Miami呢？