將軍澳釣魚記

將軍澳釣魚記

「嗱，今次不如等我帶你出海啦。有個地方我好熟㗎，港鐵站一出，行十分鐘都唔使。要山有山、要水有水，景致一流！仲可以釣好多魚，多到牛媽唔使買餸。我怕正得滯，你老總炒你請我咋！」大泡和講。

話出海，其實大泡和講緊嘅係租架艇仔去釣魚。平日聽人講去釣魚都要入到西貢、大埔一帶。所以當大泡和約我喺將軍澳港鐵站等嘅時候，我真係R晒頭。點知喺將軍澳港鐵站一出，沿住個荒廢嘅草地行十分鐘左右，經過一條行人隧道就見到一條布滿咗舢舨嘅河！前景係又殘又舊嘅舢舨，後景就係又高又新淨嘅清水灣半島，感覺好fusion。窄窄嘅河道望出去就係一片開揚嘅景致，甚至見到遠處喺小西灣嘅南灣半島。

大泡和好熟路咁帶住我行到河嘅盡頭，然後指住一架艇話，「哩，得呢度有艇租㗎咋。」跟手就落咗船同個船家傾。轉個頭佢返上嚟，烚熟狗頭咁望住我，「兩個鐘120蚊。」Okay啦，同想像中差不多。「重點係……」見佢閃爍其詞，我心知不妙，「我唔記得帶架罉。」

好嘢！釣魚用嘅魚餌、魚絲、魚鉤、鉛墜，「一應俱無」。「兩手空空釣魚」直頭勁過「姜太公」。無計，唯有行返出去啦。講呢件瘀事同大家分享，係想提提大家記住自備架罉入去。再唔係就出咗港鐵站，兜入將軍澳廣場2樓，嗰度都有間專賣釣魚用品嘅舖頭，由入門級裝備到專業級裝備都有，青蟲紅蟲任君選擇。唔鍾意嘅話落返樓下街市買蝦買墨魚都得，都幾方便。詳情唔講喇，自己行吓尋吓寶，費事以為牛英我收咗人哋廣告錢。

喺碼頭起步，我哋穿過一條窄窄嘅河道，沿途經過清水灣半島和Golf場。正當大泡和同我揸住架艇，當正自己係大海男兒，準備乘風破浪嘅時候，個摩打突然停咗。吓？我哋拉咗幾吓個摩打，但係一啲反應都無，唯有打畀個船家。同好重鄉音嘅船家講咗一輪之後，佢竟然同我哋講，「你哋划返嚟啦！」聽到呢句，我哋不約而同大笑咗出嚟，「唔好玩啦，你真係好鬼幽默，想笑死我哋咩？」拖拖拉拉、來來回回幾個電話，再等咗大半粒鐘之後，個船家終於死死地氣出嚟幫我哋換咗個摩打。喺呆等嗰粒鐘，我同大泡和望住距離我哋十米都無、喺岸邊釣魚啲人，不期然諗，「究竟我哋做緊咩？」困咗喺架船、架船又困咗喺海中心嘅感覺真係好古怪！好似無咗對腳，咩都做唔到咁。

其實我相信將軍澳係一個釣魚勝地，睇吓幾多人專程嚟釣就知。哈，只怪我哋釣魚技巧太差，而釣嘅時間又太短。一出港鐵站就有艇租，又可以自己揸船去啲無咩人煙嘅地方，其實都幾開心。雖然大泡和車大炮呃咗我嚟，不過都不失為一個好介紹吖。