Peter兄長年大部份時間在新加坡工作和居住，但周不時會回港一兩日，而回來的二十四小時，他可以用得好盡：踢場波、教場波、按按摩、吃頓好的雲吞麵，還可以去IFC看場戲，生活過得豐富而過癮。想更進一步的要封佢做偶像時，他說：「唔駛羨慕我，我係單身才可以成日兩邊飛！」

「唔好阻止我，係要妒忌你！」我回應。

與他邊吃着雲吞撈粗，邊傾偈。 

 

    Peter兄，出街見到球迷時，球迷通常同你講乜？

  出街坐的士，十架有四架，司機都會認得我，通常唔出聲未必認得，一開口話去邊就認得，第一句就問唔駛講波呀？！若果之前嗰晚做完live，過移民局（海關）時就會有人話，乜咁快番到嚟呀。其實新加坡同香港好近啫。

 

    你參與足球的不同工作，最喜愛的頭三位是？ 

    第一同第二係一樣嘅，就係講波同教職業波，無分先後。講波可以將自己的想法同球迷分享，教波就係可以同一班球員一齊搏命。 

    教波尤其是有好多挑戰，教巨型班又好，教青春班又好，as long as個老闆唔干擾你。我好彩教波十幾年間，干擾我嘅老闆唔多過三屆。 

    另外一樣就係男人之間嘅友誼，英文叫做commodorate。大家相處時認真時認真，輕鬆時輕鬆，連佐敦都話離開籃球壇時，最掛住就係男人之間的友情。 

 

 

    就係考驗自己熱情嘅時候，曳波都要講到好。至於教波，有成績就有球迷。 

 

 之不過其實教巨型班未必會開心過教青春班，你話帶一隊波靠有個美斯入波，定係一隊好平均有紀律肯防守嘅球隊，靠射一個罰波而贏會滿嘅啲呢？我會選擇後者。 

    所以我好鍾意摩連奴，你睇返佢車路士贏波之後，自己提早幾分鐘離場，將榮耀交俾啲球員，你話點會唔服佢吖。

 

    但係贏巴塞嗰場佢賽後又滿場飛喎。

    咁又唔同，贏巴塞喎，加上入到決賽，佢係win-win case，贏拜仁就應該，萬一輸的話，就順勢去皇馬囉，呵呵。

 

    你會唔會特別欣賞把口叻嘅領隊呢？ 

    睇佢可唔可以talk the talk, walk the talk囉。

 

    影響你最大的三位評述是誰？ 

    好，第一位，洛杉機杜奇隊（Dodges）的史高利（Scully），做到今日八十幾歲仲做緊，講嘢不慍不火，又有少少幽默感，得閒仲會教吓法文（唔怪得Peter不時都外語）。呢位史 高利，晌1962年幫杜奇隊做主隊評述都已經年薪過百萬美金。 

    第二個就梗係馬田泰萊（Martin Tyler），佢風格都似史高利咁定，仲有係佢好專業。當年來香港講英超四角賽，臨開波前一晚，佢好人好姐乜事都無，但同我去太平館晚餐竟然只食蛋治飲熱茶，原來係避免水土不服，到完成曬評述之後，先去擦餐勁。 

    第三位，都係洛杉機嘅向欣（Chic Hearn），家陣NBA講波入面嘅好多用語，好似Alle-opp呀、slam dunk都係佢創，同埋佢雖然係湖人主場嘅評述，但係打得唔好佢都會鬧，唔會淨係就住啲homer。 

    講開又講，Alle-opp嘅中文拆你屋，就得我師傅簡而清八哥所創嘅。 

    呢三個都係經典嘞，兩個來自羅省，因為八十年代羅省係運動之都。我細細個被屋企送去美國讀書，好少出街所以就成日睇電視睇運動，所以亦建立咗對美式運動嘅興趣，而家陣好多金句都係當年聽咗，而家就講番出嚟。 

    

    真係晌啲球迷整咗啲金句集，我先知大家幾受落，所以就再放膽去講。金句之中，有啲係抄外國嘅，譬如話場波放咗入雪櫃啦；但亦有啲係自創嘅，好似話蔗渣嘅價錢，燒鵝脾嘅味道，就係因為我阿爺以前成日話去國貨公司買蔗渣襪抵着，而我阿媽就逢晌我哋生日時買隻燒鵝脾俾壽星仔，咁我就將佢哋呢啲日常嘢組合埋一齊。 

    不過有時球迷們又唔係真係好了解我金句背後嘅意義。一句：十二碼一係入，一係唔入，其實背後我嘅諗法係想強調十二碼唔係一定入梗o架。我以前教波就最 憎啲老闆同後備球員一見搏到十二碼就當入咗咁開心。喂，仲未入呀！

 

    你人生經歷豐富，最enjoy邊一段日子？

    我諗係90年，移民去美國前教最後一年嘅東方，成隊都係o靚仔包括歐偉倫、譚兆偉同潘嘉明佢哋，結果嗰年開得唔好要護級，但係大家一條心，湊仔咁湊咗幾個月，結果最後連勝幾場，護級成功，搞掂。

 

    打波未必是攞冠軍最開心，睇波有Peter就一定過癮。